నీవస్తావని...

===========================
ఇంత అలజడెందుకు,మనసు నిలువదెందుకు?
పిల్ల గాలి తాకిడికే తుళ్ళి పాటు లెందుకు ?
కళ్ళు నాకు నీవైతే నా కళ్ళకెందుకాశాలు ?
నా కళ్ళల్లో నీవుంటే కలలకెందుకాత్రము ?

నిన్న నీవు లేవనా నింగి నీరుగారింది
నీ కబురు అందిందా నేల మురిసిపోతుంది
ఆ గువ్వలు చూడుమరీ గుసగుసలేబోతున్నాయ్
గూటికన్న పోకుండా నీ కబురులు చెబుతున్నాయ్

వరమాలతొ సిద్ధంగా ఇంద్రధనుసు నిలిచింది.
వరమిచ్చే పనిమీదే వెన్నెలమ్మ  వచ్చింది.
వనాలన్ని నీకోసం విరబూసీ చూస్తున్నాయ్.
వచ్చేది ఎవరని పచ్చతోరణాలు కూడ నన్ను,
నొక్కినొక్కి  చూడుమరీ ఎలా అడుగుతున్నాయో.

వస్తావని తెలుసునాకు-నీవొస్తావని తెలుసునాకు.
ఇంత చిన్న మనసులో అంత పెద్ద చోటిచ్చి,
అందమైన  తీరాలకు నన్నెత్తుకు వెళతావని,
తెలియదేమో పాపం, ఊరు సద్దుమణిగింది .

నిండు పున్నమెందుకో నిష్టోరం  వేస్తుంది  
పండు వెన్నెలెందుకో బిడాయించి చూస్తుంది
నీవొచ్చే క్షణం కొరకు నామనసు ఏగిపోతుంది
నీకోసం నన్నొదిలి  నిదుర  విడిచిపోయింది
రేయి పగలు నీకోసం ఊకుమ్మడి అయిపోయే
ఊకుమ్మడి అయిపోయే ..ఊకుమ్మడి అయిపోయే.....!!
================================

....................................య. వెంకటరమణ