అధునాతన భారతం

అధునాతనవిశ్వంతో  నన్నుకూడ మార్చుకున్నా.
అమెరికాతో పోటీపడి నా అవతారం మార్చుకున్నా.
అవతారం మార్చుకున్నా,ఆచారం మార్చుకున్నా,
అవసరమదికాకున్నా ఆ పద్ధతి నేర్చుకుని
ఆపదలోపడుతున్నా అదే బాట నే నున్నా.
పెద్దమ్మా,చిన్నమ్మా-అత్తమ్మా, నాతమ్మా
అందరేడబోయేనో !అంటీతొ తేల్చేసి,ఎంటేంటో అంటున్నా.
అధునాతన విశ్వంలో నన్నుకూడ మార్చుకున్నా.
విభజించి పాలించు రాజ్యమేలు సిద్ధాంతం
ఏకంగా ఎత్తుకొచ్చి ఇంటగూల్చ పెట్టుకున్నా
ఏడుమూరలెందుకని,ఎడించీలేసుకుని,
నాదేశందేముందని ఆదేశంననుసరించి,
ఏడడుగుల నడకేందని ఏకాంగానేతించా
‘ఉమ్మడంటే కుమ్ముడని’అమ్మడేమో ఆడబోయే,
తమ్ముడేమో ఈడబోయే,అమ్మ జాడ తెలియకాయే,
అధునాతనవిశ్వంలో అమ్మజాడ తెలియకాయే.
కప్పుకునే గొప్పులన్ని ఇప్పనాకు సిగ్గులేదు
సిగ్గుకంటే సిగ్గుబోయే,అధునాతనవిశ్వంలో బొత్తిగా దగ్ధమాయే.
అధునాతనవిశ్వంలో అన్నిమార్చుకున్నా,
ఇన్నొంకులు తిప్పలేక అమ్మభాష వదులుపెట్టి,
అమెరికాతో పోటీపడి ఆంగ్లభాషనేర్చుకున్న,
అవతారం మార్చుకున్న,ఆచారంమార్చుకున్నా.
అధునాతనవిశ్వంతో  నన్నుకూడ మార్చుకున్నా.

......................................య.వెంకటరమణ

( అధునాతనం గోరి పరదేశాలతో పోటీపడుతూ మనం సాధించిందేముందో కాని, అవసరం లేని పరదేశీ విధానంలో-భాషనూ, వస్త్రధారణను, ఆప్యాయంగా పిలిచే పిలుపులను,ఉమ్మడి కుటుంభజీవనాన్ని అన్నీ వదిలేసి, ఆరడుగుల చీర ఎవరు కడతారని . చిన్న చిన్న చెడ్డీలు వేసుకుంటూ ,, సాంప్రదాయ విధానపు పెళ్ళిళ్ళు మాని సహజీవనాలు చేస్తూ, రిజిస్టర్ పెళ్ళిళ్ళు చేసుకుంటూ,మన ఆచారాలను హతమారుస్తున్నాం.చివరికి ' తెలుగు అయితే ఇన్ని వంకులు తిప్పి వ్రాయాలి. ఇంగ్లీష్ అయితే దించిన పెన్ ఎత్తే పని లేదని మాతృ భాషనూ కూడా వదిలేస్తున్నాం .ఇది నేటి దౌర్భాగ్యం . ఇదేనా అదునాతనమంటే ? )