బజారు మధ్యన బ్రాందీ షాపులు

సిటీ మధ్యలో పర్ణశాలలు
ఫారం హౌసులో పోకిరి పంటలు
ఎత్తుగ కట్టిన ప్రహారి గోడలు
ఎవరొస్తారిక భయమే లేదు !!

రోడ్డు ప్రక్కనా లవరు పార్కులు
లవరుపార్కులో పొదల గొడుగులు
గేటు ముందరే సౌకర్యాలు
ఎర్రపెట్టేలో ఎయిడ్సు మందులు !!

ఇటుప్రక్కనేమో స్కూలు పాకలు
అటుప్రక్కనేమో కల్లుపాకలు
భావిపౌరులకు వేసే బాటలు
పుట్టుకనుండే పునాది రాళ్ళు !!

బజారు మధ్యన బ్రాందీ షాపులు
బారుల సౌఖ్యం బోలెడు బోలెడు
బడిశాలలకే ఠికాన లుండవు
ఊరుకు బయటా ఓమూల కట్టుడు!!

అమ్మేటోడికి అనుమతులిచ్చుడు
కొనేటప్పుడు కట్టడులెట్టరు
కాల్చేటప్పుడు కట్టంటారు
ధూమ్రపానమది నేరం నేరం !!

చీమలు దూరని ఇరుకు సంధులో
ఏనుగునంపే ఇమాన్దారులు
జరాస కూడా జంకని వీళ్ళు
చట్టం మార్చే సమర్దులీళ్ళు !!

...........య. వెంకటరమణ