అదిగో అభాగ్యులకు హారతిపళ్లెం

=========================
అదిగో అభాగ్యులకు హారతిపళ్లెం
ఎదురెళ్లే దరిద్రులకి ఏకదాటి సత్కారం
అభ్యున్నత పధంలో ఆరో అడుగు
అంకెల గారడిలో అగ్రగామి తతంగం

బిక్షగాళ్ల ఉన్నతికై సన్నాహాలు సిద్ధం
ఆర్తులకై ప్రణాళికలు సిద్ధం,సంసిద్ధం
ఆకలిబాధలు మేమెన్నటికీ సహించం
ఆకలి ఏడ్పులు నిర్మూలిస్తాం
ఆ ఏడ్చే మిషన్లేవో మేమే కొనిస్తాం

పేదిరికాన్ని సమూలంగా రూపుమాపుతాం
సమాధులు కొరత రాకుండా జగ్రత్తపడతాం
సముద్రంలోకైనా వాళ్ళని ఈడ్చేస్తాం
పేదిరికాన్ని సమూలంగా రూపుమాపుతాం

నిరుద్యోగ సమస్య నివారిస్తాం
అడుక్కునే మిషన్లకు తయారు చేసైనా
ఆపరేటరు పోస్టులు సృష్టిస్తాం,భర్తీ చేస్తాం
నిరుద్యోగ సమస్య సమూలంగా రూపుమాపుతాం

కుల మత భేదాలను ఖండిస్తాం
మా పల్లెలు,మీ పేటలు ఇలానే కొనసాగిస్తాం
అందుకు భూములు కేటాయిస్తాం,
కాస్త దూరంగానే అవి కొనిపెడతాం
కుల మత భేదాలను ఖండిస్తాం
రిజర్వేషన్లు ఇలానే కొనసాగిస్తాం

రోటీ కపడా ఔర్ మకాన్
ఆ పనిలోనే మేమున్నాం 
ఆకలిచంపే బిళ్లల తయారీలో మేమున్నాం
బట్టకొరత ఎక్కువగా ఉన్నట్టుంది
చెడ్డీలేసుకుని తిరిగే అనుమతి మేమిస్తాం

విమానం రేట్లు బాగా తగ్గించాం, నెమ్మదిగా
బస్సు రేట్లు కూడా అక్కడికే తెచ్చేస్తాం
సామ్నాన్యుడు చింతించే పనిలేదు
కాలుకు ఐదు, చేతికి పది
ప్రాణానికి పాతికవేలైనా మేమిచ్చేస్తాం
బ్రతికేం సాధిస్తాం, ఆ పాతికైనా మిగిలిద్దాం

ఇంకా బోలెడు ప్రస్తావనలు నెమ్మదిగా చర్చిద్దాం
వచ్చే ఎలక్షన్లో మమ్మల్ని గెలిపిస్తే
జాతకం చివరిపేజీ ఉచితంగా మేమిస్తాం
అభాగ్యుల వెనువెంటే మేముంటాం
అంటని  ఆ భాగ్యానికి చింతిస్తాం
===========================.
ఇది కూడా ఓ కవితేనా అనకండి సుమీ °°°