కవిత వ్రాయాలని ఉంది

1846
తెలుగు రచన
25/06/2019
==================
కవిత వ్రాయాలని ఉంది
నాకో కవిత వ్రాయాలని ఉంది
కన్నీటి ధారలు కలంనింపి
నాకో కవిత వ్రాయాలని ఉంది

ఉదరమంటిన వెన్నుమకపై
బరువుమోపి మోయలేక
చెమటలోడ్చే బడుగు స్వేదం
సిరా నింపిన కలంతో

నొక్క కవితను ఇప్పుడన్నా
నొక్కి వ్రాసే మక్కువుంది

పట్టెడన్నం పొట్టకందక
పొదలమాటున మల్లెపూలు
రక్తసిక్తపు ముళ్లపానుపు
ఒకో చుక్కా కలం నింపి

నొక్క కవితను ఇప్పుడన్నా
నొక్కి వ్రాసే మక్కువుంది

దగాకోరుల మదంకోరల
కాటుపడ్డా కడుపుమోసి
కాలమేగతి కస్సుగంప
బావిపౌరుల పుస్తకంలో

నొక్క కవితను ఇప్పుడన్నా
నొక్కి వ్రాసే మక్కువుంది

హద్దులేని ఆకశంలో
అంతులేని ఆసురతత్వం
అంతమొందే అక్షరాలను
చట్టమయ్యే పొత్తకంలో

నొక్క కవితను ఇప్పుడన్నా
నొక్కి వ్రాసే మక్కువుంది

అవిటివానికి అవిటిపిల్లలు
చెవిటివానికి చెవిటిపిల్లలు
ఇప్పుడైనా మూగవాడు
నోరువిప్పి నారదీసే

నొక్క కవితను ఇప్పుడన్నా
నొక్కి వ్రాసే మక్కువుంది

మానవత్వం మొలకలొచ్చే
విత్తమొక్కటి వెతికి వెతికి
అక్షరాలా ఎరువుగా నొక
కొత్తతోటకు అంకురార్పణ

నొక్క కవితను ఇప్పుడన్నా
నొక్కి వ్రాసే మక్కువుంది
==================
యలమంచిలి వెంకటరమణ