గుండెల్లో లేకుండ భక్తి

◆◆◆◆◆◆◆◆◆◆
గుండెల్లో లేకుండ భక్తి
కొండల్లో ఉంటుందా ముక్తి
పక్కోడి సొమ్మంతా కొట్టి
పైవాడికేస్తావా రాశి

రోజంతా చేసేదే ఘోరం
లెంపల్తో పోతుందా పాపం
మనసంటూ ఉంటే నేస్తం
ఒప్పేసుకోవయ్యా సత్యం

మొసంగా పోగేసి పైకం
మోక్షానికిస్తావా లంచం
పైవాడి కేడుంది షాపు
కొంటాడా ఏంటయ్యా స్టాకు

నువ్ చేసుకున్నాదే నోటు
మొన్నేగా కాల్చావో లాటు
పస్తులతో పేదోళ్ల పాట్లు
గుడి నింప వేస్తావా నోట్లు

నమ్మయ్య కాదేమి నేరం
మూఢంగా నమ్మేస్తే క్షవరం
కొంతైనా చేవయ్యా సాయం
తనకింక నీవేగా దైవం

నదిలోకి విసిరేస్తే నాణెం
వస్తుందా ఏమయ్యా పుణ్యం
ఓ పూట కూడెడితే నయ్యం
పది రోజులుంటాడు పాపం

పుట్టలో పోసేస్తే పాలు
ఏదయ్యా తాగేందుకు వీలు
వెనకొచ్చు నిలబడితే పాము
వేసేస్తా రేమంటే, భయము

కొండల్లో ఉంటాడా దైవం
గుండెల్లో చూడయ్యా నేస్తం
నీ మనసు నీకేలే సాక్షం
అది, ఒప్పుకుంటేనే మోక్షం
◆◆◆◆◆◆◆◆◆◆
                    తెలుగు రచన....✍